EP - NEWS

Aperila 28, 2019: Sauniga Asosa "Ta'ita'i: Felise E Augafa" Iosua 6:3-4 "O le vala'au e faamalosi" "Clarion Call" 

Sauniga masani o le Asosa. O lea fo'i aso sa faamanatuina ai le A'oga a le 'au sa'ili'ili o le a faia lea i Aso toonai Me 4,11,18,25. O le faamoemoe e o'o atu i le Aso faamanatuga o Iuni ua faapena ona faapa'iaina i latou i totonu o le ekalesia. Sa faapena fo'i ona faailoa ai le a'oga o le "Piano Lessons", e fia amataina i le "Summer" pe a tu'ua a'oga a le fanau.

Aperila 21, 2019: Sauniga Asosa o le "ESETA". Ta'ita'i: Pesaleli Poufa (Toeaina malolo manumalo)

Matagofie lava fo'i lea aso i le Sauniga sa ta'ita'iina e le tama malolo manumalo "Pesaleli Poufa". Sa tapenaina ai fo'i e le mafutaga a le autalovou ma le a'oga Asosa se porokarame o le Eseta. Ina ua mae'a fo'i le sauniga o lea aso, sa fiafia faatasi le ekalesia faapea nai aiga na asiasi mai mo le toona'iga. Viia lava fo'i le alofa ma le agalelei o le Atua ona o le avanoa e tapua'i faatasi ai fo'i ma le faletua ia "Fa'atofa Filoialii" i lea Asosa.

.

Aperila 15-20, 2019: Fonotatalo o le Vaiaso Pa'ia

O lea vaiaso atoa mai i le Aso 15 e o'o i le Aso 20 sa faia ai se fonotatalo i luga ole upega tafailagi a le ekalesia "www.scccep.com, ma sa ta'ita'iina lea e le faife'au ia Felise E Augafa, ma le tina ia Avataeao Augafa. E faia lea i le 5:30am ma sa faapena fo'i ona faalauaitele atu i luga o le facebook & messenger a le ekalesia. Sa molimauina lava le to'atele o le atunuu, uo ma aiga sa latou molimauina lea faamoemoe, ma sa latou lotulotu mai i luga o le upega tafailagi i ia sauniga o le vaiaso paia. Viia lava le Atua i le tele o ala ese'ese ua tatou maua i o tatou fo'i vaitau e fa'asalasalau ai le tala i le Keriso manumalo.

Aperila 14, 2019: Sauniga o le Asosa "Laupama" Ta'ita'i: Siatini Siatini Jr (Tiakono)

Talu ai ona ua le avanoa le hall e masani ona faia ai Sauniga i Asosa, o lea sa faia ai lenei sauniga i se tasi fo'i o hall i 8831 Railroad i El Paso lava. Matagofie lava fo'i tapenaga i le susuga i le Tiakono ma ua aumai ai fo'i se fe'au taua mo le ekalesia i lea aso. O lea fo'i aso sa fa'aulufale mai ai le susuga i le Tiakono ia Leiato ma le faletua, ma ua avea ai fo'i i la'u ma totino o lenei ekalesia i El Paso. E le gata i lea, sa lotu mai ai fo'i le susuga i le "Failauga Metotisi" ia Afa Taupo ma le faletua ia April, o se tasi fo'i o alo o Samoa o loo iai i vaega 'au a le malo, ma ua o mai fo'i i El Paso mo a'oga fa'alemalo mo le tausaga. O le a faapena foi ona matou galulue i El Paso a o iai i la'ua i lenei vaitau. O i la'ua fo'i na iai i le amataina o lenei galuega.

Aperila 7, 2019: Asosa Faamanatuga.  Ta'ita'i: Felise E Augafa

O lea sauniga sa fa'ataunuuina lea i le 'Nolan Richardson Recreation Center' ona ua le avanoa fo'i le hall lea e matou te faaaogaina. O le sauniga masani o le faamanatuga. Le faaitiitia lava le agaga faafetai, ona o loo vaaia pea le to'atele o nisi o le atunuu sa mafai ona asiasi mai, ua le gata i lenei Asosa a o Asosa uma lava, e vaaia lava ni foliga ese i tapua'iga. E moni lava o loo iai lava le Atua i mea uma.

Mati 10, 2019: Lotu a le Lalolagi (Mafutaga Tina mai Slovenia)

O lea sauniga o le a faatinoina lea e le mafutaga a Tina i El Paso. E vala'au atu fo'i i le mamalu o le tatou atunuu o loo aumau ai i lenei nuu o El Paso, e manaia fo'i le tatou faatasi ai e molimauina lea sauniga Paia ua tapena iai tina mai se tasi o atunuu o Europa o "Slovenia". E tuu atu lava i lau faitalia, ae mafai lava ona e la'ei mai i laei fo'i o lea atunuu pe a tusa ai mo lea sauniga.

Mati 1, 2019: Sa'iliga a le A'oga Asosa / Sunday School Fund Raising

E vala'au atu i le ava ma le fa'aaloalo tele i lo tatou atunuu o loo aumau ai i lenei nuu o El Paso, o le a faia le sailiga seleni a le A'oga Asosa i le Aso Faraile, Mati 1, 2019 i le hall i le 4805 Byron St. O lea lava faamoemoe e mo le faatinoina lava o nisi o galuega fa'ale-A'oga Asosa, faapea ai ma le faatinoina o fuafuaga ma "Project" ua mae'a ona faatatia a le a'oga Asosa mo lenei fo'i tausaga. Matou te taliaina lava so'o se mea ua outou mafai ona foa'iina i lea aso mo lea faamoemoe. Faafetai

Fepuari 24, 2019: “Tatalo mai le LOTO” (Pray from the heart)

O lea sauning na faataunuuina i le "Nolan Richardson Recreation Center" i El Paso. Sa amataina lava fo'i lea Asosa i le A'oga Asosa sa amataina i le 9:00am ona soso'o ai lea ma le sauniga i le 10:30am. Sa molimauina lava le alofa o le Atua i lea fo'i aso, sa fa'atumulia lava fo'i lenei sauniga i lona aiga lotu, faapea nisi o uo ma 'au mea mamae na asiasi i lea aso. Sa manatuaina i le aso le tina ia "Precious" o le sa tuueseeseina ma le oloa taua i le Aso lulu "Feb 20, 2019 i le falema'i a le malo i El Paso. Manatua lava fo'i nisi o totino a le ekalesia o lo'o toesea ona o tiute faale-malo e pei ona iai le susuga ia "Koke Pomele" o loo iai i Korea, o le susuga ia "Ithran ma faletua", o loo tiute i Afghanistan, faapea le to'atele lava o totino o lenei aiga lotu o loo tautua ai i vaega 'au a le malo i El Paso.

Fepuari 22, 2019: “Lotu a le Autalavou"

O le taumafaiga lava ina ia faamasani fanau talavou i ta'ita'iga o sauniga faapea galuega faale-tapuaiga. O se sauniga muamua lea a le Autalavou i lenei fo'i tausaga, ae sa vaaia lava le sagisagi mai o tupulaga faapea o latou matua i lea afiafi. O le susuga ia "Vincent Ho-Ching" sa ta'ita'iina lea sauniga. O le failauga o le susuga lea ia "Fa'a Pulou", o le faitauina o le Tusi Paia, o le atalii ia "Sam Sione (O.T) ma le afafini ia "Zaida Pomele(N.T), ma le afafine ia "Evangelist Siatini" sa na faitauina le faa-Peretania o le OT & NT.

Fepuari 17, 2019: “O le fa’atāua e sili atu” (Surpassing value)

O le tina o le galuega ia "Avataeao Augafa" sa fai ma o matou tofi i lea aso. Talu ai sa galulue uma fai pese i lea aso e tusa ai lava tiute ma galuega fa'ale-malo, o lea sa tula'i ai le faife'au e ta'ita'iina le galuega fa'apese i lea aso. Viia lava le Atua i lona alofa ma lona agalelei, sa i'u manuia lea sauniga i le faatasi mai o le Matai.

Fepuari 10, 2019: Lotu Tupulaga i El Paso

Sa faataunuuina i lea aso le Lotu o tupulaga i totonu i El Paso. O le susuga i le Peresetene o le Autalavou ia "Kilini (Clint) Filoialii" sa fai ma failauga o lea aso e molimoli mai foi se faamalosi mo tupulaga i lea aso. O le faletua o le tiakono ia "Pua Pousima" sa fai ma ta'ita'i o le sauniga. Sa faapena lava fo'i ona fa'aaogaina ai fo'i nisi o fanau mo le tofiga o talosaga ma le faitauina o le Tusi Paia i lea aso. Matagofie tapenaga uma a le mafutaga faapea faaevagelia na saunia e le fanau e molimoli mai ai le feau taua mo fanau faapea le aofia na mafai ona auai ma molimauina lea faamoemoe.

Fepuari 3, 2019: Asosa Faamanatuga "E afio le Atua i mea uma?""God is everywhere? ( Galuega 17:23)

O lea aso sa amataina ai A'oga Asosa. Sa matagofie lava le to'atele o alo ma fanau a le ekalesia na mafai ona auai mai i lea taeao mo le uluai aso e amataina ai lea faamoemoe. O lea fo'i aso sa papatisoina ai se tasi o fanau. O le alo ia "Joshua Malosiakeakamai Carter" sa fa'apaiaina i le na aso e ala i le Sakarameta o le Papatisoga. O lona tina o Latesha Carter sa na molimauina lea faamoemoe. O le viiga e fo'i pea i le Atua.

Ianuari / January 27, 2019 "Fa'apa'iaina TOFIGA o le 2019.

O lea Asosa sa fa'apa'iaina ai tofiga uma o le Ekalesia ma ona lala aua le galuega ua amataina o lenei tausaga. Sa auai fo'i le Tama Malolo manumalo ia "Pesaleli ma le faletua ia Siaitolo Poufa" e molimauina lea fa'amoemoe. Sa maua ai fo'i le avanoa o le Tama malolo e saunoa ai fo'i i se upu faamalosi ma faamanuia i le au mautofi o lenei tausaga. O i latou ia ua tasi iai se finagalo o le ekalesia ma ona lala e tulai mai i lenei tausaga.

Ekalesia: Ta'ita'ifono a le ekalesia: "Alao'o Pulou", Failautusi "Siatini Siatini Jr", Teutupe "Nele Ho-Ching".

Aufaipese: Ta'ita'i: Samu Jr. Sione  Failautusi: Viavia Leifitele Teutupe: Faafetai Pomele.

Autalavou: Peresetene: Kilini (Clint) Filoialii,  failautusi: Pua Pousima, teutupe: Terisa Tuialuuluu.

A'oga Asosa: Ta'ita'i: Tone Pulou,  failautusi: Pene Vaisagote,  teutupe:  Folole Siatini.

Mafutaga Tina: Peresetene:  Melinda Sione,  failautusi:  Terisa Tuialuuluu,  teutupe:  Ailini Pulou.

Mafutaga Tama: Peresetene:  Tom Ho-Ching,  failautusi/ teutupe: Tone Pulou

 

Ianuary / January 20, 2019: Tofi Lauga o le susuga i le Faifeau Toeaina Malolo Manumalo "Pesalele Poufa"

Sa faamanuiaina fo'i lenei Aiga lotu i se upu fa'amlosi, po o se fe'au matagofie na fofogaina e lana auauna, le Tama toeaina malolo manumalo ia "Pesaleli Poufa", o le tofi o lea Asosa. O le agaga faafetai i le Atua e le faaitiitia ona e avea pea le asiasi mai o tama o le ekalesia e faalototeleina ai fo'i lo'u nei tagata a o feagai ai ma le galuega i El Paso nei. Manuia lava fo'i taualumaga uma o le galuega ma o loo va'aia pea le sagisagi mai o tagata uma i mea fai faapea sauniga i lea Asosa ma lea Asosa. Ia maualuga pea le viiga  o le Atua i mea uma ma auaunaga uma ua faia.

 

Ianuari / January 3, 2019  Lotu Talosaga "O le Upu o le 'oloa pito taugata""The WORD is a treasure"

O le susuga ia Siatini Siatini, o le Ta'ita'i / Failautusi a le ekalesia i El Paso mo le taimi nei. O ia lea sa ta'ita'iina le sauniga i lea afiafi. Sa ia fofogaina fo'i se fe'au matagofie ma le faamalosi 'au mo le ekalesia, e faalototeleina ai fo'i tagata uma i le amataga o lenei tausaga fou. To'atele lava fo'i le 'au molimau ma ta'utinoga o lea afiafi. E leai lava se oa e sili atu i loo lo tatou aveaina lea o Iesu, o le UPU o le na liu tino tagala, e fai ma 'oa taua mo le tatou faigamalaga i lenei tausaga. Ia manuia tele lenei tausaga i galuega, tiute ma faiva o le a feagai ai. Faafetai.

Ianuari / January 2, 2019 Lotu Talosaga "O Lou fa'asinomaga, ua valaau ai i tatou e le UPU""The Word calls us home". (Teu 30:14)

Sa ta'ita'iina lenei sauniga e le tina o le galuega ia Avataeao P. Augafa (CTS) ma le mamalu i le mafutaga a Tina i El Paso. O le Matua o lea aso e tusa ai ma le faasinomaga a le Tusi tatalo o le vaiaso, e maua i le "Teuteronome 30:14 "Ae matua lata mai lava le Upu ia te oe, i lou gutu, ma lou loto, ina ia e faia....). Matagofie fo'i molimau ma ta'utinoga o lea afiafi, manaia fo'i le fa'alogologo i molimau mananaia mai tagata o le aulotu, ma ua maua ai fo'i se fesoasoani mo le una'iina o le galuega i lenei tausaga ua amatalia.

Tesema 31, 2018 Lotu o le vaeluaga o le Tausaga / New Year Eve Service:

Matagofie lava molimau ma faamalosi'au na fofogaina i lea fo'i afiafi e tama ma tina, faapea le mamalu o le ekalesia. Maua ai fo'i.ni manatu lelei aua le savaliga i luma faapea le faatinoina o fuafuaga faatatitia a le ekalesia mo lena tausaga fou. Sa to'atele lava e na mafai ona auai i lea sauniga, ma sa molimauina lava fo'i le to'atele o aiga ma uo, o e na asiasi mai i lea po ua maualuga ai lava lena afiafi. Viia lava le alofa ma le agalelei o le Atua i lana tausiga ma lana puipuiga i le ekalesia i El Paso, mai lava i e matutua se'i o'o lava i se aopito itiiti. O lea lava fo'i vaiaso o le a amataina ai Lotu talksaga e pei ona faatulagaina i le Tusi failotu mo le tausaga 2019, o le a faia lea i le Aso Tofi & ma le Aso Faraile i le itula e 7:00 i le afiafi. E maua pea le avanoa e soo se tasi e fia auai i lea sauniga, faapea fo'i mo se molimau a o se faamalosi'au mo le tatou galuega mo le tausaga 2019.

Tesema 30, 2018 Asosa mulimuli o le tausaga.

O le Asosa mulimuli lea o le tausaga 2018. Sa ta'ita'ia lava e Felise Augafa (FS) lea sauniga e tapenapena atu ai fo'i mo le tausaga fou. E le faaitiitia lava le agaga faafetai i le Atua i lona fa'atautaia pea o lenei faigamalaga i lenei tausaga o le a faai'uina. Molimauina pea lona auai i fuafuaga faapea galuega fai o lena tausaga. O le tatalo le uma, ia latalata mai pea o Ia a o sauni lenei aiga lotu e sopo atu i le amataga o lena tausaga fou, ia faaouina fo'i ni manatu ma ni lagona aua porokarame faatatia o lena tausaga. Tumau pea ia te ia lona viiga e le aunaoa.

Tesema 24, 2018

Sauniga o le "Christmas Eve". O le agaga fiafia tele ma le faagae'etia i le matagofie o tapenapenaga ma sauniuniga o lea aso aua le faamanatuina o le Aso soifua o lo tatou Alii e ala i le pepe o le Kerisimasi. Manaia lava tapenaga a le mafutaga a le Autalavou ma le Aoga Asosa. E momoli atu ai le faafetai tele i le Peresetene a le Autalavou ma le ta'ita'i o le a'oga Asosa mo mea uma i lena afiafi. Sa toatele lava foi nai aiga asiasi mai i le afiafi ua matagofie ma maualuga ai lava lea po. Viia lava le suafa o le Alii. Ina ua mae'a le sauniga i lea afiafi, sa fai ai fo'i se vaivela na saunia e le mafutaga tina ma sa tufatufaina ai le la'au Kerisimasi a le fanau. Ia MANUIA TELE  LE KERISIMASI MA LE TAUSAGA FOU!

 

Novema 30, 2018

Sa faia ai le sa'iliga seleni (Family Nite) mulimuli a le ekalesia mo le tausaga 2018. Sa faia lea faamoemoe i le Hall a le ekalesia Katoliko i El Paso (4805 Byron St. 79930) talu ai o loo faatali pea le galuega o le fanua a le ekalesia i le (4131 Thomason Av. 79904). Sa matagofie lava lea afiafi i le faatasi mai o Tama ma Tina matutua, faapea le aotelega o le ekalesia i ona tofiga ese'ese. Sa agalelei ma fesoasoani mai fo'i le toatele o alo ma fanau o loo tautua i totonu o vaega 'au a le malo i lea faamoemoe. Tumau pea i le Atua Silisili lona lava viiga e faavavau.

Novema 21, 2018

Sa faia le sauniga o le Aso faafetai i le 7:00pm i le afiafi. Sa maua lava le avanoa e nisi o le ekalesia e tutula'i ai foi ma molimau e tusa ai ma le alofa o le Atua, ua le gata i le taumafaiga o o latou aiga, a o le faafetai i le Atua e tusa ai ma le galuega i El Paso o lea lava ua amata ona toe atagia mai lava le faamoemoe. 

 

Novema 25, 2018

O lea Asosa sa fai ai le sauniga a le mafutaga tina i El Paso. Sa ta'ita'iina e le faletua o le faifeau ia Avataeao P. Augafa. O le au mautofi o lea aso o le tina matua ia Folauoula Pulou (Lauga). Sa faatino ai fo'i se faaevagelia e le mafutaga e molimoli mai ai se faamalosi'au mo le ekalesia ma lana galuega o loo feagai ai.

 

Novema 4, 2018

Sa fa'apaiaina ma aloa'ia ai le tofi Tiakono o le susuga ia Tone Pulou ma le faletua ia Ailini Pulou. Ua avea nei i la'ua ma Tiakono i le galuega i El Paso. Viia pea le alofa ma agalelei o le matai o le galuega, o loo Ia auina mai pea ana auauna aua le galuega o loo atina'eina i lenei fo'i itu o le malo tele.

 

Oketopa 14, 2018

WHITE SUNDAY: Sa ta'ita'iina lea sauninga e le susuga i le Tiakono ia Siatini Siatini, o le Ta'ita'i, a o le failautusi fo'i o le ekalesia i El Paso. O lea Asosa sa tuuina ai le avanoa i Aiga taitasi e tapena ai a latou tauloto ma pesepesega aua le faamanatuina o lena aso o le fanau. O lea fo'i Asosa sa, e to'alua alo ma fanau a le ekalesia na papatisoina ai. O le atali'i ia Tyrone Maliliefa Pulou, o le alo a le susuga i le Tiakono ia Tone & Ailini Pulou, faapea le atali'i ia Shurran Samuel Sione, o le alo a le susuga ia Samu & Melinda Sione.

September 30, 2018

Sa aloa'ia ai le susuga i le Tiakono ia Amasaia Pousima ma le faletua ia Pua Pousima, e o mai le ekalesia i DC, o lea ua iai so la'ua lagona e fia fa'aaogaina lo la'ua tofi Tiakono mo le galuega i El Paso. Sa faapena ona talia fiafia e le ekalesia le auauna ma le faletua ma aloa'ia ai loa lo la tofi mo le galuega i El Paso. 

September 23, 2018

Ulua'i sauniga lea  a le Misionare fou, le susuga i le faife'au ia Rev. Felise Augafa i le ekalesia i El Paso. 

September 17, 2018

Sa faia ai le fa'amavaega a le Ekalesia ma le Komiti Misionare i le afiafi i le Nolan Richardson Recreation Center i El Paso. O lea afiafi sa saunia ai e le Ekalesia se taumafataga ma isi fa'aaloaloga e faaali ai lo latou agaga faafetai i le Komiti faapea le Ekalesia aoao e tusa ai ma le talia o le faatalosaga a le ekalesia, lea ua faatinoina i le Asosa ua mavae. Sa tuua e le komiti El Paso i le taeao e soso'o ai mo Oklahoma.

September 16, 2018

     O le Asosa lea sa fa'apa'iaina ai le Tofi faife'au o le Misionare ia Felise & Avataeao Augafa, o le a avea ma Faife'au Misionare, ma o le a galulue i le Ekalesia Faapotopotoga Kerisiano i Amerika Samoa - El Paso. Sa ta'ta'iina lea sauniga e le susuga i le Faife'au po'o le Ta'ita'i o le Komiti Misionare ia Rev. Sekuini. O le susuga ia Rev. Salesa Faalau na alo mo le talosaga, o le susuga i le faife'au ia Rev. Ekitoa Sopoaga na faitau Tusi Pa'ia, a o le susuga i le faife'au Rev. Ulyssess (CCCAS Oakland) na alo mo le Lauga. O le susuga i le faife'au misionare ia Felise Augafa na faatinoina le Sakarameta o le Faamanatuga. 

September 15, 2018

      Sa taunuu mai ai le susuga i le A'oa'o ia Felise E Augafa ma le faletua ia Avataeao P. Augafa i El Paso Texas e tusa ai ma le faatalosaga a le Ekalesia i El Paso, ua moomia se misionare fou mo le galuega. Sa malaga fa'atasi mai le susuga i le A'oa'o ma le faletua ma le susuga i le Feagaiga ia Salesa Faalau (Sui Ta'ita'i Komiti Misionare) aua le momoli mai o le misionare fou.

     O lea lava fo'i aso na taunuu mai ai le Ta'ita'i ma le Failautusi o e Komiti Misionare ia Rev. Sekuini & Rev. Sopoaga mo lea lava faamoemoe.

ekt.png
SPATS-LOGO-1.jpg
ncc.jpg
icete-riad-kassis-id-designate-announcem
lf_logo.png
piula.jpg
cccas(2).jpg

©2018 by Samoan Congregation Christian Church in El Paso. 

Contact: Rev. Felise E Augafa     Email: augafaf@yahoo.com     Ph: (915) 263-7932